TANGIANG NI DAKDANAK

Diundang sada keluarga do manang na piga halak sakarejo ni amanta i mangan bodari di jabunasida.

Dung rade sipanganon jala pungu angka undangan i, didok amanta i ma anakhonna na marumur 9 taon mambaen tangiang. Ai ndang apala somal amanta i martangiang huroa.

“Baen ma jolo tangiang mangan anaha,” ninna amana i tu anakna.

“Ndang huboto manang aha dohononku,” ninna anakna i mangalusi.

“Baen ma,” ninna inana. “Songon na hudok i baen,” didok inanta.

Jadi, “martangiang” ma anakna i, “Ale Tuhan, ai boasa ma ingkon saonari ro tamunami on, ai gabe mansai repot jala loja do omakhu, Amen”.

(Huroha sangan do otik marungutungut inanta i tingki marhobas mangarade sipanganon ni tamu i).

Mansai denggan do pasomal-somalon partangiangon di jabu rap dohot angka dakdanak. Marhite sian i lam magodang ma nasida hombar tu lomo ni roha ni Tuhanta. Partamueon pe naeng ma nionjar ni holong dohot las ni roha.