IBOTO NI SIBOLIS

Di sada minggu hobas be do angka ruas laho tu Marminggu tu gareja. Andorang so dipungka parmingguon, di na hundul be angka ruas dohot parhalado, tompu ma ro sibolis di jolo ni gareja i. Mamintor gaor ma. Na deba marsurak mardongan biar jala marlojong pasiding sibolis i.

Angka na so boi marlojong, dilojonghon ma sian bagasan. Ale adong sada halak na so olo haruar jala hot hundul tenang di bangkuna. Ndang adong biarna.

Songon na tarhalomong Sibolis i. Hebat ma amanta on ninna rohana. Dijonohi Sibolis i ma ibana huhut didok,

“ Ndang ditanda ho au?”

“Ba tangkas do hutanda. Sibolis do ho ndang i?” ninna ibana palan.

“Jadi, ndang mabiar ho tu ahu?” ninna sibolis i muse, huhut tamba gogo soarana.

“Ndang mabiar ahu!”

“Boasa ndang mabiar ho tu ahu?”

“Nunga marhasohotan ahu dohot ibotom di jabu 56 taon lelengna,” ninna amanta i.

Aut sura ina hian na hundul i, ra dohononna ma, “ nunga marhasohotan ahu dohot ‘laem” 56 taon”.

Ai ia tung sipata pe sibolison dongan saripe niba, boasa pola dohonon iboto manang lae ni sibolis atehe! Ai pasupasu ni Debata do dongan saripe.

BATAK DOHOT JAHUDI

Dung mulak wisata rohani Ama Rohana sian Jerusalem, didok ma tu donganna sapunguan koor, “Godang do hasarupaan ni halak Batak tu halak Jahudi. Ra sian Jahudi do Batak manang sabalikna,  Batak sian Jahudi,” ninna ibana.

“Angka dia ma hasarupaanna?” ninna sahalak donganna sapunguan i manungkunhon.

“Angka pistar do halak Jahudi. Halak Batak pe na pistar do. Jarang do halak batak dohot halak Jahudi na boi dioto-otoi. Na paoto-otohon do adong sada-sada. Dung i muse, pangaranto do halak Jahudi. Halak batak pe songon i do, hira adong do di sandok portibi on. Angka na asing, taringot tu parianakhonon, paradaton dohot na asing, hira godang do hasarupaanna” ninna ibana.

Ditambai sahalak na asing ma patorangkhon, tutu do i, pangaranto do halak Batak dohot Jahudi. Jala tu na dua on ndang marlangku pandohan “ Di mana langit dijunjung di situ tanah dipijak”. Anggo di halak Batak dohot Jahudi, on do: “di mana langit dijunjung, di situ tanah digarap” ninna ibana.

“Anggo na huboto parasingan ni halak Batak do dohot Jahudi,” ninna na sada nari muse.

“Dia ma i?” ninna Ama Rohana, ala so apala diida ibana adong parasingan.

“Sude do hita umboto barita taringot tu na ditamuei Tuhan Jesus 5000 halak.  Sampulu dua ampang dipapungu lobina. Boasa lobi? Ala holan halak Jahudi disi na ro. Aut sugari adong halak Batak disi, ndang adong lobi i, ai masiboan palastikna be do,” ninna ibana.

Gabe mengkel ma nasida sude, mamarengkeli dirina sandiri.

Sasintongna, angka na burju do halak Batak, nang pe adong do tutu angka hahuranganna. Alai las ma rohanta ala dihaolongi Tuhanta do halak Jahudi dohot halak Batak, ro di sude tahe jolma tinompa ni Tuhanta. Holong ni Tuhanta i ma mangonjar rohanta mampareahi na dumenggan di ngolu on.